ញ៉ូវយ៉ក៖ នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានថ្លែងថារាល់ដំណើរទស្សនកិច្ចរបស់សម្ដេចទៅក្រៅប្រទេសគឺមានគោលដៅចំនួន៣ គឺ ការទូត នយោបាយ និងសេដ្ឋកិច្ច។ សម្ដេចថាសម្ដេចនឹងមិនគ្រាន់តែពាក់អាវធំដើរធ្វើឱ្យខូចប្រយោជន៍របស់ប្រជាពលរដ្ឋនោះទេ។

ថ្លែងក្នុងជំនួបជាមួយពលរដ្ឋខ្មែររស់នៅកាណាដា និងអាមេរិក ថ្ងៃទី២៣ ខែកញ្ញា ឆ្នាំ២០២៣ នៅទីក្រុងញ៉ូវយ៉កសហរដ្ឋអាមេរិក សម្ដេចធិបតី ហ៊ុន ម៉ាណែត បានថ្លែងថា ការធ្វើដំណើររបស់សម្ដេចទៅក្រៅប្រទេសគឺដើម្បីបង្កើតទំនាក់ទំនងជាអន្តរជាតិ បង្ហាញថាកម្ពុជាជាប្រទេសឯករាជ្យអធិបតេយ្យ បញ្ជាក់ពីជំហររបស់កម្ពុជា និងគោលដៅសំខាន់បំផុតនោះគឺទាក់ទាញអ្នកវិនិយោគបង្កើតទីផ្សារជូនដល់ប្រជាពលរដ្ឋ។

សម្ដេចថា៖ «ដើរទាក់ម៉ូយនេះគឺមិនមែនសម្រាប់ខ្ញុំទេ! គឺដើរទាក់ម៉ូយសម្រាប់ប្រជាពលរដ្ឋហើយនេះជាកាតតាព្វកិច្ចរបស់រាជរដ្ឋាភិបាលតាំងពីសម្ដេចតេជោក៏ដូចគ្នាឥឡូវនេះក៏ដូចគ្នាគឺត្រូវធ្វើមិចដើរមែនចំណាយពេលជិះកប៉ាល់ហោះ២០ម៉ោងមែនប៉ុន្ដែមិនឱ្យខាតប្រយោជន៍ជាតិនិងប្រជាជនទេ»។

កាលពីថ្ងៃទី២២ សម្ដេចធិបតីក៏បានចូលរួមវិស័យឯកជនអាមេរិកនិងកម្ពុជាដើម្បីដោយសង្ឃឹមថានឹងអាចភ្ជាប់ទំនាក់ទំនងពាណិជ្ជកម្មជាមួយក្រុមហ៊ុនអាមេរិកបន្ថែមទៀតផងដែរ៕